„Сејф сити“ почна да регистрира прекршоци во Скопје, Куманово и Тетово, како и на Коридорите 8 и 10. На скопските улици и булевари, сликата е драстично поразлична од претходно.
Ако има ограничување 30, а вие возите со брзина од 37км на час ќе ви стигне казна. За ограничувањата од 50, дозволено пречекорување е 9км на час односно ако возите 60 ќе бидете казнети. Дозволено пречекорувањето на автопатите со ограничувања 100 км на час и повеќе е 12 км на час. Ако возите со брзина од 113 км на час или 133 на места каде ограничувањето е 120, исто така ќе добиете казна.
Премиерот Христијан Мицкоски вели дека прагот на толеранција за брзо возење ќе се намалува со тек на време и ќе се изедначи со европските прагови.
За возење над дозволената брзина, казните се поделени според тоа колку километри се пречекорени. Во урбани зони до 50 километри на час, се казнува со 15 евра. Пречекорување од 10 до 30 километри на час, носи казна од 50 евра, додека над 30 до 50 километри на час се предвидува казна од 300 евра и забрана за управување со возило од 3 до 12 месеци. Минување на црвено светло ќе се санкционира со 250 евра и забрана за управување возило од 3 до 12 месеци, додека непрописно паркирање на тротоари, на пешачки премини или на места за лица со попреченост ќе се казнува од 25 до 180 евра. За управување возило со истечена сообраќајна дозвола или без регистарски таблици, казната изнесува 500 евра, а за возење со дозвола истечена до 30 дена се предвидува казна од 100 евра.
Сите граѓани што ќе добијат казна можат да го искористат попустот за рано плаќање, кој изнесува 50% од износот доколку казната се плати во рок од осум дена. Исто така и доброволното признавање на прекршок, носи помала казна и пократка забрана за возење.
„Безбеден град“ ќе детектира четири сообраќајни прекршоци: непрописно паркирање, управување со брзина поголема од дозволената, минување на црвено светло и управување со возило со истечена сообраќајна дозвола.
Возачите кои ја надминат дозволената брзина, но останат во рамки на толерираната граница, ќе добиваат информативна порака како предупредување, без парична казна. Доколку прекршокот доведе до опасност или повреда, санкциите се строги, вклучувајќи и кривична одговорност.
Со воведувањето на „Безбеден град“, очекувано е да се зголеми сообраќајната дисциплина, особено на критичните точки каде што најчесто се случуваат сообраќајки.
