Прашањето за минималната плата треба да се решава преку договор меѓу работниците и работодавачите, а не преку политички иницијативи. Ова денеска од Тетово го истакна премиерот Христијан Мицкоски, коментирајќи ги барањата на синдикатите и предлогот на опозицијата за законско зголемување на минималната плата.
„Работниците и работодавачите се тие што во бипартитен дијалог треба да најдат решение за минималната плата, а Владата е само фасилитатор.“ – вели Христијан Мицкоски – претседател на Владата.
Мицкоски порача дека Владата нема да презема улога што не ѝ припаѓа и дека политичките партии не можат да одлучуваат во име на работниците или работодавачите. Според него, минималната плата е социјално прашање што треба да се решава во рамки на Економско-социјалниот совет, без политички притисоци.
Во однос на јавниот сектор, каде државата се јавува како работодавач, премиерот потсети дека за најголемиот дел од вработените односите се веќе регулирани. Како што посочи, нерешен останува уште мал дел од администрацијата – околу 7.700 до 7.800 административни службеници, за кои понудата е веќе доставена до синдикатите.
Понудата предвидува зголемување на примањата во наредниот период и, како што беше посочено, не е условена со место или формат на средбата.
„Доколку синдикатите се согласат, за две години и два до три месеци овие 7.700 до 7.800 административни службеници ќе имаат минимум 40 проценти повисоки примања.“ – вели Христијан Мицкоски – претседател на Владата.
Изјавите на премиерот доаѓаат по протестот на Сојузот на синдикати на Македонија, на кој беше побара минималната плата да изнесува 600 евра, наспроти сегашните 400. Од Владата порачуваат дека за државната администрација понудата е веќе ставена на маса, додека за останатите работници решението треба да произлезе од директен договор меѓу работниците и работодавачите, со улога на државата како посредник.
