Во просториите на Здружението на пензионери во Берово, полициски службеници од Одделението за внатрешни работи Берово денеска реализираа превентивна едукативна средба со пензионери. Средбата беше организирана во рамки на превентивните активности на МВР, под мотото „Градиме пријателство – создаваме безбедност“, со цел информирање и заштита на постарите лица од измами, кражби и други имотни деликти.
На присутните како што информираа од ОВР Берово им беше презентирана актуелната состојба со имотни измами на подрачјето на СВР Штип, при што беше посочено дека најчести таргети на ваквите кривични дела се повозрасните лица, кои неретко се доведуваат во заблуда преку лажно претставување и инволвирање на блиски членови од семејството, со цел изнудување парични средства.
-Полициските службеници дадоа конкретни совети за самозаштита, меѓу кои: внимателност при движење на јавни места, задолжително затворање на вратите и прозорците при напуштање на домот, чување на вредните предмети на безбедно место, како и пријавување на секоја сомнителна појава во полиција. Посебно беше нагласено дека не треба да се објавува отсуство од домот на социјалните мрежи, како и никогаш да не се оставаат отклучени врати, се вели во соопштението од беровската полиција.
Во делот на џебните кражби, на пензионерите им беше укажано да носат со себе само неопходна сума пари, паричникот и мобилниот телефон да ги чуваат во предните џебови, а торбите секогаш да бидат затворени. Во случај на сомнеж или забележување на необични детали, како тетоважи, белези или однесување на сомнителни лица, веднаш да се контактира полицијата.
-На присутните им беше потенцирана и од навремена соработка со полицијата и пријавување на сите настани на бесплатните телефонски броеви 192 и 112. За таа цел, беа поделени и летоци со едукативни содржини за препознавање и заштита од измами, провални и џебни кражби, подвлекоа од ОВР Берово.
Од страна на полициските службеници беше нагласено дека ваквите превентивни активности ќе продолжат и во иднина, со цел зголемување на безбедноста и информираноста на граѓаните, особено на повозрасната популација.
