Универзална сала ќе блесне со нов сјај. В понеделник ќе биде донесена одлука кој ќе биде изведувач на целосната обнова на овој значаен културен објект. По повеќе од една деценија Скопје ќе добие концертен простор по сите стандарди.
„Едната постапка е завршена, а втората е во фаза на евалуација. Се информирав сабајле, комисијата веќе работи, веќе се во завршна фаза и дека во понеделник ќе треба да се донесе одлуката за избор.“– вели министерот за култура и туризам, Зоран Љутков.
Претходниот тендер, распишан лани, пропадна по што постапката беше вратена на почеток. Надлежните сега уверуваат дека обновата ќе заврши на време и салата ќе биде готова до 2028-та година кога Скопје ќе биде европска престолнина на културата.
Целата изградба треба да чини околу 20 милиони евра, распределени во три буџетски години.
Универзалната сала почна да се реновира предизборно, на крајот на мандатот на градоначалникот Петре Шилегов, а потоа градежните активности целосно запреа. Обновата продолжи по две години, но во април 2024-та избувна пожар на градилиштето по што работите повторно запреа.
Според проектот, новата Универзална сала треба да има капацитет од 1.200 седишта, наместо како претходно 1.500, но затоа ќе има поголема сцена и поширок простор за публиката. Надлежните велат дека ќе бидат запазени сите безбедносни и енергетски стандарди, а ќе биде вградена и најсовремена сценска техника.
Инаку Универзалната сала беше изградена во 1965-та година, како дел од постземјотресната обнова на Скопје, а низ децениите прерасна во култен културен објект.
