Предвремени парламентарни избори нема да има, Македонија ќе оди на редовни во 2028-ма, потврди премиерот Христијан Мицкоски. Вели дека иако од гледна точка на ВМРО-ДПМНЕ предвремено изборно соочување би им одговарало согласно рејтинзите, сепак државата сега нема простор да загуби шест месеци во период на техничка Влада, што целосно би ги блокирала економските и политички процеси. Според Мицкоски тоа би било неодговорно, во период кога мора да се средуваат лошите наследени работи и да се направат низа реформи за подобар живот на граѓаните.
-Ако гледаме од оптиката на ВМРО-ДПМНЕ, што е наш интерес, наш интерес е да има предвремени избори, зошто би се откажал, напротив јас би стимулирал, ако тоа сум го кажал и ако гледам од оптиката на интерес на ВМРО-ДПМНЕ и коалицијата. И сега замислете јас на крај на емисијата, да ви реков да ние се подготвуваме за предвремени парламентарни избори и да потрошиме уште половина година живот на нашите граѓани, замислете каков лицемер би бил, изјави Мицкоски.
Иако Мицкоски јасно кажа дека предвремени избори нема да има, од опозициската СДСМ сепак биле сигурни дека ќе има. Венко Филипче повторно реши и за оваа тема да говори за други држави, односно Србија и Унгарија. Ќе имало таму избори, па поради и во Македонија.
-Во однос на нашата подготвеност, апсолутно во било кое време сме спремни да настапиме на избори, притоа мислам дека конечно на граѓаните им е јасно за каква Влада станува збор и дека повеќе нема да може да помине лажната пропаганда, со која што тие дојдоа на власт во 2024-та година, кога да потсетам со националистичка реторика, со пропаганда дека СДСМ се предавници на националните интереси, ветуваа подобра преговарачка позиција со ЕУ, изјави Филипче.
Претходно Али Ахмети кажа дека имал средба со Мицкоски, на која имало наводно ветување дека ќе има предвремени парламентарни избори, па потоа се повлекол, затоа што на ВМРО-ДПМНЕ не му одговарало тоа.
Матеја Петровски
