Најжешкото столче на државниот обвинител би требало да се пополни до крајот на идниот месец. Во трката влегуваат пет искусни кривичари, поранешни и актуелни обвинители и судии откако на полноќ истече рокот за пријави во Собранието. Оттаму велат ќе почекале ден или два, да не случајно залутала некоја пријава по пошта.
Потоа, согласно законската процедура, пријавите од Собранието ќе бидат испратени до Владата. Владата, пак, кандидатурите ќе им ги даде на Советот на јавни обвинители чии членови имаат 15 дена законски рок да дадат позитивно или негативно мислење, за секој од кандидатите одделно.
Од Владата велат дека ќе го соопштат својот став откако ќе се произнесе Советот.
Имињата на кандидатите и се добро познати на јавноста. Според информации што кружат во судските кулоари највисоко котира сегашната вд државна обвинителка Анита Тополова Исајловска. Таа е и најмалку позната на јавноста, а досега вешто ги избегнува новинарите. За неа за првпат се слушна откко една недела пред Нова година беше изгласана за привремен старешина откако претходниот државен обвинител Љупчо Коцевски поднесе оставка.
Меѓу кандидатите е и добро познатата обвинителка Лидија Раичевиќ . Доаѓа од редовите на Републичкото обвинителство. Досега гонела во бројни медимско експонирани предмети. До Собранието Раичевиќ има доставено и стратегија според која ќе се води доколку седне на јавнообвинителската фотелја.
Не толку познат на јавноста е и кандидатот сегашен судија во Кривичниот суд во Скопје, Ненад Савевски. Тој пред да биде избран за судија, беше обвинител.
Меѓу кандидатите е и екс претседателот на Кривичен суд, Владимир Панчевски. Има работено и како истражен судија и судија во Одделението за организиран криминал. Пред да биде избран за судија има искуство и во финансиската полиција и во Јавното обвинителство.
Во трката е и добро познатата обвинителка од пропаднатото СЈО, Ленче Ристовска. Таа водела истраги за корупција и организиран криминал. Од 2018 година е избрана за обвинител за врски во Агенцијата на ЕУ за соработка во кривичната правда Еуроџаст.
