Градоначалникот на Општина Делчево, Иван Гоцевски, денеска во својот кабинет оствари работна средба со Ашок Џеин, директор на индиската компанија „Кришна Ламикоут ПВТ Лимитед“.
Како што информираше Гоцевски, средбата е реализирана по заедничка иницијатива на индискиот бизнисмен и претставници на локална приватна компанија од Делчево, со цел разгледување на можностите за потенцијална деловна соработка.
-На состанокот разговаравме за можностите за инвестиции во Делчево, за расположивите ресурси од различен капацитет, како и за законските рамки врз основа на кои би можела да се реализира евентуалната соработка. Посебно ме радуваат позитивните впечатоци и првите импресии кои ги сподели нашиот гостин за убавините и потенцијалите што ги нуди општината, истакна Гоцевски.
Тој нагласи дека локалната самоуправа е подготвена да обезбеди целосна поддршка за сите сериозни инвеститори кои имаат интерес да вложуваат во Делчево.
-Го уверив г-динот Џеин дека Општина Делчево со целиот свој административен и институционален капацитет ќе биде ставена во функција на неговите потреби и планови, доколку се донесе одлука за конкретни инвестиции во нашата општина, додаде Гоцевски.
Од Општина Делчево оценуваат дека ваквите средби се значаен чекор во насока на привлекување странски инвестиции и отворање нови можности за економски развој на локално ниво.
Локалната самоуправа и во иднина ќе продолжи активно да работи на промоција на инвестициските потенцијали на Делчево и создавање поволна деловна клима за домашни и странски инвеститори.
