И годинава, како и многу пати до сега, членови на Бадникарскиот одбор заедно со новиот кум Зоран Кондратенко и новиот здравичар Јаков Дренковски, во пресрет на централната манифестација Бадник 2026, утрово ги посетија штитениците на Домот за стари лица Мајка Тереза, за да им ги честитаат големите христијански празници Бадник и Божиќ.
Од Бадникарскиот одбор им подарија овоштие, негазирани сокови, погача и бадникови гранчиња, а кумот им подари клима инвертер. На овој начин Бадникарскиот одбор ја продолжува традицијата оваа манифестација да има и хуманитарен карактер.
А за да биде овој настан во духот на празниците, се погрижи и свештено лице кое ги освети погачата и бадниковите гранчиња.
Во организација на Одборот за традиционална прослава на Бадник во Скопје денеска по 34-ти пат на платото пред соборниот храм „Свети Климент Охридски“ ќе се одржи манифестацијата Бадник 2026.
Според најавите од организаторите, како и минатата година делењето бадникови гранчиња ќе се одвива во дворот на Храмот од страната на булеварите „Партизански одреди“ и „Св. Климент Охридски“.
