Вицепремиерот за политички систем упати божиќна честитка до Скопскиот бискуп и Апостолски егзарх во Македонија, монс. д-р Киро Стојанов и до верниците од католичка вероисповед по повод големиот празник Божиќ.
– Рождеството Христово е празник на љубовта и радоста, празник на спокојот и милосрдието, празник кој нè потсетува на вистинските патишта и нè учи да ги почитуваме високите морални вредности. Божиќ е денот на радоста во душата кај секој верник, кога во мир и спокој ја прима и се радува на веста за Христовото раѓање. Оттаму Божиќната радост да ја споделиме со најмилите и најблиските, затоа што овој светол ден не учи на милосрдие и солидарност, на споделување и помагање на оние на кои тоа им е потребно, затоа што порачува да бидеме човечни и да ги сакаме нашите блиски, но и подалечните, се вели во честитката.
Во овие времиња, додава Димовски, најмногу ни се потребни токму овие вредности.
– Затоа што добрината е нападната од нечесноста, затоа што делбите, притисоците и одмаздата станаа основна карактеристика на нашето општество, затоа што е присутно чувството на страв, немир и разочараност кај луѓето и зато што некои заборавија на разумот и на мудроста и сето тоа мора да престане. Повторно да завладее добрата мисла, благиот збор и трезвеноста. Да си го повратиме заедништвото и да го зацврстиме единството, вели вицепремиерот Димовски во честитката..
