Економскиот факултет при Универзитетот „Св. Кирил и Методиј“ е домаќин на првата дводневна работилница (хакатон) на која ученици и наставници од регионалните центри за стручно образование и обука, под менторство на професори и студенти од факултетот, изработуваат бизнис-планови за основање реални училишни компании во склоп на овие образовни установи.
Реалните училишни компании овозможуваат зголемување на практичните можности за учениците, развој на претприемачките и деловните вештини кај нив и подобра подготовка за брзо и успешно вклучување во економијата. Овој тип на компании носат дополнителен приход за училиштата од вршењето правно регулирана комерцијална дејност, и тој приход е значаен за обезбедување одржлив развој на самите училишта зашто тие ќе може да го инвестираат во дополнителен раст и прогрес.
Министерката Весна Јаневска на отворањето на хакатонот рече дека со бизнис-планови што ќе се изработат ќе може да се отворат реални компании во седумте регионални центри за стручно образование низ земјава, што е дозволено со новиот Закон за стручно образование и обука.
– Тоа е важно затоа што учениците ќе имаат можност за повеќе практична настава, а училиштата ќе можат идејата да ја реализираат во пласирање на продуктот кој тие би го изработиле. Учениците ќе можат да научат и како да се вклучат на реалниот пазар во стопанството, а уште поважно и што самите училишта ќе станат самоодржливи, изјави министерката Јаневска.
Во моментов има седум регионални центри за средно стручно образование низ државава, а до крајот на 2027 година ќе биде отворен и осмиот, последен, кој ќе биде во Скопје.
Јаневска посочи дека регионалните центри се заинтересирани за оваа можност од која имаат големи придобивки затоа што има, рече, и напредок на училиштата и напредок на учениците.
– Во меѓувреме, ги опремуваме седумте центри, четири се комплетно опремени, сите се функционални, но ќе треба и мали реконструкции и доопремување за да можеме да се пофалиме дека во иднина ќе станат центри на извонредност, изјави министерката.
Деканот на Економскиот факултет Мијалче Санта изјави дека настанот што го организираат со МОН и со средните училишта во државава ќе покаже како преку институционална соработка може да се креира дополнителна вредност и да помогнат во унапредувањето на образованието на сите нивоа.
– Економскиот факултет како водечки факултет за економија и бизнис образование во државата има општествена одговорност таму каде што може да се вклучи да даде активен придонес и со тоа да овозможи колку што можеме унапредување на образовните процеси и примена на практични искуства во образованието во државата, рече проф. Санта.
Директори на регионалните центри, наставници и ученици присутни на работилницата учат како да креираат бизнис-план со кој ќе ја прошират дејноста на училиштата, согласно Законот за стручно образование и обука. Се очекува во текот на идната година веќе да се основаат првите реални училишни компании.
