Националата Федерација на фармери го поздрави брзото и навремено реагирање на институциите за случаите поврзани со злоупотребата на ИПАРД програмата. Првиот човек на Федерацијата, Јорданоски смета дека истрагата треба да се спроведе до крај и да се изречат соодветни казни. Од Федерацијата велат дека точна бројка на земјоделци кои останаа во ќорсокак со истрагата – немаат, но алармираат дека треба што побрзо да заврши целата истрага за да можат земјоделците и понатаму да ги користат средствата.
„Го поздравуваме реагирањето на институциите за случаите на злоупотреба на ИПАРД програмата. Сметаме дека истрагата треба да се спроведе докрај и да се изречат соодветни санкции. Тоа е во интерес на сите и на земјоделците и на земјоделските компании, кои се најголеми корисници на ИПАРД. Овие средства се наменети за развој и модернизација на земјоделството и руралните средини, а не за злоупотреба“ вели Стеванче Јорданоски, претседател на Национална Федерација на фармери
Расчистувањето на злоупотребите е добредојдено за да се воведе ред во овој значаен сектор кој се соочува и со други предизвици. Клучниот на кој останува да се работи во иднина е работната сила, нелојалната конкренција но и откупните цени. За земјоделците е клучно да има и засилени активности во делот на едукација но и поддршка за инвестирање во нови технологии.
„Голем проблем за нас, земјоделците, е миграцијата и непостоење интерес кај младите да се занимаваат со земјоделство. Загрижувачки е податокот дека миграцијата на граѓаните од руралните средини кон градовите и европските држави достигна 50 проценти високо ниво. Според Пописот во 2021, Македонија се соочува и со изразена регионална нерамномерност на населението помеѓу урбаните и руралните средини“ вели Стеванче Јорданоски, претседател на Национална Федерација на фармери
Претседателот на Федерацијата истакна дека особено охрабрувачки било што се поголем број земјоделци, кои навистина живеат од земјоделството, се регистрираат како мали оператори со храна, додавајќи вредност на своите производи.
Давид Крстевски
