Повеќе туристи, повеќе странски гости и зголемена економска активност. Првите десет месеци од годинава носат позитивни бројки за туризмот и градежниот сектор во Македонија.
Според официјалните податоци, вкупниот број туристи е зголемен за повеќе од 5 проценти, додека бројот на странски посетители бележи раст од околу 9 проценти. Во истиот период се регистрирани над три милиони ноќевања, што укажува на зголемен интерес за земјава како туристичка дестинација.
„Многу е важно дека мерките на владата во овие први 10 месеци резултираа со зголемен број на туристи и зголемен број на странски туристи. Зголемен број на туристи во првите 10 месеци е повеќе од 5% во вкупна бројка, а странските близу 9%. Очекувам на крајот на годината да имаме двоцифрен број во проценти раст и во бројот вкупен на туристи, но и кај странските туристи. Имаме некаде од прилика во првите 10 месеци околу 3 милиони регистрирани преноќувања што е добро и очекувам во периодот таа бројка да се зголемува. Активно ќе работиме и работиме веќе со активни политики бидејќи многу се важни, туристичкиот сектор е многу важен бидејќи прво е промоција за државата, за би рекол релативно мала и малкубројна држава како нашата. И второ тоа многу значи кеш пари во македонската економија. Така што ние ќе продолжиме и понатаму да ги поддржуваме овие политики.“– порача премиерот Христијан Мицкоски.
Од Владата очекуваат позитивниот тренд во туризмот да продолжи и до крајот на годината, со дополнителен придонес кон економскиот раст и зголемен прилив на средства во домашната економија.
Покрај туризмот, позитивни движења се забележуваат и во градежниот сектор.
Во октомври годинава е регистриран значителен раст на бројот на издадени одобренија за градење, за повеќе од 20 проценти во споредба со истиот месец минатата година. Според надлежните, тоа укажува на зголемени инвестиции и поинтензивна градежна активност.
„А што се однесува до бројот на одобренија за градење, да тие во октомври месец имаат би рекол мини бум, некаде околу 22–23% е повеќе од октомври месец минатата година, што значи дека имаме повеќе инвестиции, имаме повеќе градба. И тоа е добро за БДП во четвртиот, последен квартал од годината, така што очекувам позитивни резултати на крајот од годината.“– изјави премиерот Мицкоски.
Растот во туризмот и градежништвото, според најавите, треба да даде позитивен импулс и во последниот квартал од годината. Од Владата порачуваат дека ќе продолжат со активни политики за поддршка на секторите кои носат економски раст и директна корист за македонската економија.
