Зад секоја дијагноза, стои човек, но, за оние, кои живеат со ХИВ, најтешкото – не е вирусот, туку – осудата.. стигмата и дискриминацијата, продолжуваат да ги изолираат овие луѓе, оставајќи ги да се борат, не само за своето здравје, туку и за достоинство. Ваква судбина делат околу 700 луѓе во Македонија, од нив 30 проценти не се дијагностицирани. Од оние, пак, кај кои е потврден вирусот, 90 насто се на терапија и имаат успешен третман.
“Иако здравствените установи спроведуваат повеќе тестирања по број, сепак граѓанските организации се за некаде 12 пати поуспешни во дијагностицирањето на ХИВ позитивни.Податоците говорат дека граѓанските организации откриваат еден ХИВ позитивен случај на спроведени 150 тестирања.Додека пак здравствените институции евидентираат еден случај на направени 1.150 тестирања” велат од ХЕРА.
“Она што често го гледаме е дека кај младите има зголемена свесност за ХИВ.Тоа најчесто доаѓа преку културата, преку филмови исерии и на социјалните меидуми, а не на систематски начин” велат од Здружението “Заедно посилни”.
Во моментов на Клиниката за инфективни болести во Скопје се лекуваат 459 пациенти, тие примаат редовна терапија која вклучува современи лекови согласно најновите препораки на СЗО.
Според податоците од ИЈЗ годинава во Македонија регистрирани се 38 случаи со ХИВ/СИДА, а осум луѓе починале. Повеќето од новите случаи се од Скопје, на возраст од 20 до 39 години. Годинава има 14 бебиња родени ХИВ негативни, иако некој од родителите им е со позитивен ХИВ статус.
