Уште една кривична пријава за струшкиот градоначалник – Рамиз Мерко, овојпат за незаконско одобрување градежни работи што довеле до оштетување на спомен-куќата на писателот Влаго Малески – заштитен културен објект. Полицјата соопшти дека покренала постапка против пет лица, меѓу кои инвеститор, архитект-конзерватор, двајца службеници од општината и градоначалникот Мерко.
Според истрагата, инвеститорот од Велешта на 15-ти октомври нелегално ја урнал старата струшка куќа на парцела во центарот на градот и, при копањето, ги поткопал темелите на соседниот објект – спомен-куќата на Малески. Покрај инвеститорот, архитектот-конзерватор од Охрид, вработен во Завод и музеј, незаконски одобрил проект што не смеел да биде усогласен со идејното решение. Градоначалникот Мерко, пак, потпишал дозвола за градба спротивно на стручните акти, а раководителот на урбанизам и неговиот помошник изготвиле документација со која, како што тврди полицијата, бил заобиколен законот.
