Штип, е подготвен да помогне во расчистување на ѓубрето во главниот град. Градоначалалникот, Иван Јорданов, најави дека во готовност се комунални возила кои доколку биде потребно, веднаш да тргнат за Скопје. Преку ЗЕЛС, се чекат насоки за како градоначалниците да се солидаризираат и да помогнат во расчистувањето на сметот во Скопје, кое е пред вистинска еко-катастрофа.
„Верувам дека ќе се солидаризираме преку ЗЕЛС, да дадеме меѓуопштинска поддршка со одредени ресурси, притоа нормално завршувајќи ги сите примарни активности во нашиот град. Ние стоиме на располагање да дадеме поддршка и помош, бидејќи општинската соработка мора да постои и да ја има“, изјави градоначалникот на Штип, Иван Јорданов.
Во меѓувреме во Штип, финишираат градежните активности на новиот булевар „Партизанска”. Потегот помеѓу населбите Осми Ноември и Баби, целосно ќе биде урбанизиран и ќе биде идниот развој на градот. Овде ќе никне најголемиот еко-парк во регионот, а предвидена е изградба на неколку станбени и деловни објекти.
„Како зона за домување ќе биде доста атрактивна локација. Градот ќе се развива во таа насока и ќе биде потенцијално место за домување на многу наши сограѓани, но и на жители од околните места кои го таргетираат Штип, како едно урбано и модерно место на живеење“, изјави Иван Јорданов, градоначалник на Штип.
Јорданов, најави дека деновиве ќе бидат готови и типските куќи во кои треба да се вселат семејства кои живееја покрај трасата по која поминува булеварот.
