Речиси 178 милиони денари или скоро 2.9 милиони евра исплатени за тендери само од јануари до сега. Комунална хигиена троши сериозни суми народни пари, а Скопје останува затрупано во смет.
Специјалните возила за чистење ѓубре и целиот возен парк на Комунална хигиена во последните две години се сервисирале за над два милиони евра, па оттука главниот град би требало да биде чист како стакло, наместо да е потонат во ѓубре и со наезда на стаорци.
И не само редовни сериси, се купувале гуми, бандажи, масла, антифриз, федер платна, железарија, бош пумпи. Не се штедело ниту на канцелариски материјали, пијалоци, на осигурањето на имотот, сервисирање на фотокопири, противпожарни опреми, и на резервни делови за цел возен парк. Последниве две години во претријатието Комунинална хигиена очигледно не се работело домаќински и се склучувале тендери од неколку илјади па се до 250 илјади евра, буквално за се што треба и не треба.
Само последниот тендер за сервис на возила од Комунална хигиена е тежок речиси 250.000 евра. На овој тендер потпис ставил актуелиот директор од ДУИ, Сабахудин Рустеми, именуван од актуелната градоначалничка Данела Арсовска.
Дел од Склучен тендер за Сервисирање на специјални комунални возила од 03.07.2025
Вкупната цена на нашата понуда, вклучувајќи ги сите трошоци и попусти, без ДДВ, изнесува: 14.929.950,00 (четиринаесетмилиони деветстотини дваесет и девет илјади деветстотини и педесет) денари.
Вкупниот износ на ДДВ изнесува 2.687.391,00 денари/
Претходно, се потрошени речиси 60 илјади евра за технички преглед на возилата којшто го спровела фирма од скопско Чучер Сандево.
Дел од Склучен тендер за технички преглед на специјални комунални возила и лесни возила 30.04.2025
Предмет на овој договор е јавна набавка на услуга Технички преглед на специјални комунални возила и лесни возила, по приложена техничка спецификација.
Вкупната вредност на договорот изнесува 1.500.000,00 денари без ДДВ, или 1.770.000,00 денари со вклучен ДДВ.
Страниците на Електронскиот систем на Јавни набавки за последниве години е преполн со тендери на Комунална хигиена. Тендерите ги спровеле актуелниот директор и неговиот претходник Гоце Трајковски кој беше поставен на местото на Косана Мазнева, екс директорката која беше блиска со Арсовска, но вообичаено за градоначалничката, се скара и со неа. И во тоа време Скопје беше потонато во ѓубре.
Проблемот со натрупаното ѓубре во Скопје се провлекува низ целиот мандат на Арсовска. Пред два месеци граѓаните се кренаа на протести поради Вардариште и Дрисла, а неколку диви депонии гореа околу градот со што го загрозија здравјето на граѓаните. Исто така, дел од градоначалниците на скопските општини со години реагираат за работата на претпријатието коешто е под палката на Арсовска бидејќи поради натрупаниот смет, се принудени самите да се организираат и да ги чистат скопските улици.
