ВМРО-ДПМНЕ би добиле над 60 пратеници, а СДСМ би завршиле со 20-на пратеници доколку резултатите од првиот круг на локални избори се пресликаат на моделот за парламентарни. Ова го покажуваат анализите и проценките на двете партии. Од владејачката ВМРО-ДПМНЕ велат дека со добиените 300 000 гласови на локалните избори, на потенцијални парламентарни избори, според Донтовиот модел, партијата би освоила над 60 пратеници, додека, пак, за СДСМ велат дека во некои Изборни единици би била трета партија.
„На овие избори, ВМРО-ДПМНЕ освои 12 000 гласа повеќе од 2021 година, додека СДСM потона со минус 111 000 гласа. Ова е пораз кој најдобро ја отсликува недовербата на граѓаните во нивните промашени политики, неспособно владеење и неквалитетни кадри.“- велат од ВМРО-ДПМНЕ.
Наспроти овие резултати, од опозициската СДСМ велат дека според нивните анализи, тие би освоиле најмалку 21 пратеник, а ВМРО-ДПМНЕ би имала најмногу 52.
„Историската победа на овие локални избори на ВМРО-ДПМНЕ се должи на успешната работа на градоначалниците од редовите на ВМРО-ДПМНЕ изминатите четири години, како и работата на владата предводена од ВМРО-ДПМНЕ и претседателот Христијан Мицкоси, кои го поддржаа општините како никогаш до сега.“- изјави Валентин Манасиевски од ВМРО-ДПМНЕ.
Според податоците на Државната изборна комисија, на првиот круг од локалните избори, ВМРО-ДПМНЕ и коалицијата освоија 301 720 гласа, додека коалицијата предводена од СДСМ доби 125 758 гласа. Влајдечката партија освои и 550 советнички места, а опозициската 230. ВМРО-ДПМНЕ во првиот круг доби и градоначалници во 32 општини, а СДСМ во 3.
