Со огромна чест и длабока благодарност стојам денеска пред вас не само како кандидат за градоначалник за втор мандат туку како ваш пријател, ваша сосед и човек што ја дели истата љувоц за нашата Гази Баба. Вие граѓаните ми ја дадовте довербата пред четири години, доверба што за мене беше голема обврска да работам, чесно, одговорно и домаќински, да бидам глас на народот, да бидам присутен на терен а не во канцеларија, да слушам, а не само да зборувам. Да делувам, не само да ветувам, порача кандидатот за градоначалник на Гази Баба Бобан Стефковски на вечерашниот митинг на ВМРО-ДПМНЕ и коалицијата.
Тој потенцира дека во изминатите четири години било направено многу за општината, но и оти во иднина ќе се прави уште многу.
-Реализиравме 670 нови проекти насекаде низ нашата Гази Баба. Изградивме 32 километри нова мрежа на фекална канализација. Градиме три нови детски градинки во Трубарево, Инџиково и Маџари. Иаградиме училишни спортски сали во Булачани и Стајковци, а со забрзана динамика се гради и новата сала во Црешево. Градиме нова училишна сала за ООУ Крсте Мисирков во Ченто и комплетно го реконструираме домот 11 Октомври кој долги години беше ветуван и забораван, рече Стефковски.
Тој потенцира дека инвестираат и во спортот, животната средина и социјалната заштита и оти не ги заборавиле ниту младите, ниту пензионерите.
-Во 2021 година Гази Баба беше затворена општина во која одлучуваа неколку локални моќници, а денес после четири години општина Гази Баба е прва општина по индексот за транспарентност на меѓународните организации. Но, она што е најважно е довербата што ја изградивме и покажав дека кога ВМРО-ДПМНЕ ја води општината дадениот збор се исполнува, рече Стефковски.
