Со работа, визија и чесно управување локалната власт предводена од градоначалникот на Општина Демир Капија, Лазар Петров, ја трансформира општината на подобро, во која секоја инвестиција е одговор на реална потреба на граѓаните, истакна вечерва претседателот на СДСМ Венко Филипче, на граѓанската трибина во Демир Капија.
Како што информираат од Социјалдемократскиот сојуз на Македонија, Филипче нагласил дека на Општина Демир Капија ѝ е потребен континуитет на започнатата работа со реализирани над 58 проекти во делот на инфраструктурата, локалниот развој, развојот на туризмот, како и во создавањето услови за младите да останат и да живеат во својот град.
– Кога ќе ги видите обновените улици, реконструираното училиште, детската градинка, новите паркови, канализационата мрежа и новата обиколница, јасно е дека тука не се ветувало, туку се работело .. Демир Капија ќе ја градиме, ќе ја развиваме и модернизираме. Ќе ја градиме со луѓе што знаат, што имаат волја и што работат за народот, а не за фотелјата. Лазар е градоначалник кој го реализира она што е ваш приоритет, а не на поединци. И ве уверувам дека така ќе продолжи, транспарентно, квалитетно и домаќински, нагласил Филипче.
Според него, разликата помеѓу СДСМ и ВМРО-ДПМНЕ е во чесноста, отчетноста и грижата за граѓаните. Тој, исто така, нагласил дека кадрите на СДСМ работат чесно и до план, заедно со граѓаните и за граѓаните.
– Кога се работи чесно и транспарентно, кога се мисли на народот, има резултати. Демир Капија денеска е општина со нов лик, со развиена инфраструктура и подобрени услови за живот. Од новите патишта, канализациите и резервоарите за вода, до уредените паркови и јавни површини – се гледа дека градоначалникот Лазар Петров знае како да се грижи за сите, нагласил Филипче.
