Ако за уплата од 500 евра кон европските земји, граѓаните плаќаа провизија од 1600 денари, сега таа изнесува само 260 денари. За приливите во евра на истиот износ надоместокот е двојно помал, односно 140 денари наспроти 280 денари.
Плаќањето со евра стана поевтино и за граѓаните и за бизнисот. Македонија и официјално е дел од СЕПА, единствената област за плаќањa во евра.
И трошоците на компаниите значително се намалуваат. Така, за плаќање во евра кон земјите во СЕПА на износ од 20.000 ЕУР, компаниите ќе плаќаат во просек осумпати помалку, односно само 570 денари наспроти 4.740 денари колку што изнесуваше до сега.
За приливите во евра на истиот износ, компаниите ќе плаќаат во просек тројно помалку.
Сите големи и средни банки се спремни за да вршат трансакции во рамките на СЕПА. Остануваат уште три коишто интензивно работат на интеграцијата и се очекува дека ќе завршат најдоцна до крајот на првиот квартал од 2026 година.
Клучниот чекор за спроведување на оваа реформа беше донесувањето на Законот за платежни услуги и платни системи.
Барањето за пристапување кон СЕПА беше поднесено на 10 јули 2024 -та, додека на 6 март 2025 беше прифатена апликацијата од страна на Европскиот совет за плаќања со што се овозможи и приклучување на домашните банки во платежните шеми преку кои се извршува плаќањето во евра. Станува збор за регион што опфаќа 41 земја.
