Поради ниските температури, грејната сезона започнува утре. АД ЕСМ која управува со скопските топлани, информира дека радијаторите во главниот град ќе бидат топли две седмици пред стандардниот почеток на грејната сезона на 15-ти октомври. Согласно регулативата, во вакви случаи има можност грејната сезона да стартува порано од предвиденото, доколку прогнозата за средна надворешна температура за наредниот ден е еднаква или помала од 12˚С. Според Управата за хидрометеоролошки работи, прогнозираната средна надворешна температура за утре е 10 целзиусови степени со што се исполнети условите за производство, испорака и снабдување со топлинска енергија.
„Според податоците од Управата за хидрометеоролошки работи, за 2 октомври е прогнозирана средна надворешна температура од 10˚С со што се исполнети условите за производство, испорака и снабдување со топлинска енергија, согласно одлуката на Регулаторната комисија за енергетика и водни услуги на РСМ. Исто така, сè до 15 октомври, на веб-страницата на ЕСМ Снабдување секојдневно ќе се објавува информација дали се исполнети условите за испорака на топлинска енергија за наредниот ден“ – АД ЕСМ Снабдување со топлина.
Дополнително, АД ЕСМ апелира до сите корисници да ги завршат потребните поправки на своите внатрешни грејни инсталации бидејќи редовното одржување е нивна обврска. Заедниците на сопственици пак, треба да обезбедат непречен пристап на службените лица до топлинските потстаници и редовно електрично напојување во топлинската станица. Тоа значи дека треба редовно да се плаќаат сметките за струја и да се обезбеди функционална електрична инсталација. Завршените интервенции треба да се пријават во Центарот за грижа на потрошувачи. Исто така, сите потрошувачи можат да проверат дали нивниот објект е на списокот на затворени објекти без услови за испорака на топлина, кој е достапен на линкот „Затворени објекти – ЕСМ Снабдување“. Во Скопје преку АД ЕСМ Снабдување со топлина, парно греење имаат 62.600 активни потрошувачи.
