Нашата цел е Битола да ја направиме модерен и уреден град, достоен за сите, истакна Тони Коњановски, кандидат на ВМРО – ДПМНЕ и коалицијата „Твоја Македонија“.
Во обраќање до јавноста, Коњановски посочи дека во изминативе четири години, Битола секојдневно се развива и гради.
-Во овој мандат, Битола конечно ќе добие модерен булеварски влез од страната на Охрид, како прв впечаток за сите посетители од оваа страна и симбол на новото време за Битола. Почнуваме со реконструкција и изградба на повеќе од 50 улици, како во градот, така и во руралните населби. Застарената водоводна и канализациона мрежа ќе биде обновена, со што обезбедуваме сигурно водоснабдување и поквалитетна животна средина, а новите улици ќе добијат целосна инфраструктура и нов асфалт. Секоја улица, секој пат што ќе го изградиме е вистински избор за иднината на нашите семејства, истакна Коњановски.
