Со водени топови и затрупување со земја на критичните места, пожарот кој два дена гореше во депонијата Дрисла, делумно е ставен под контрола. Пожарникарите повеќе од 24 часа водеа битка со огените стихии, а откако гаснењето со вода не ги дало потребните резултати, почнале со затрупување на местата каде имало постојано чадење. Директорот на ДЗС Стојанче Ангелов објасни дека проблемот со Дрисла сега е во нивни раце, откако државата вчера прогласи кризна состојба на целата територија поради пожарите, а додаде и дека постојат сериозни сомнежи дека пожарот во Дрисла е намерно предизвикан.
„Денес Управувачкиот комитет за управување со кризи и предложи на Владата да донесе одлука за забрана за движење во депонијата Вардариште. Оваа депонија ќе биде обележена и движењето низ неа ќе биде казниво. Така ќе спречиме злонамерници да се движат во оваа депонија, истата ќе биде внимателно обезбедена и ќе спречиме намерно но и ненамерно нејзино потпалување“, изјави директорот на ДЗС, Стојанче Ангелов.
Градоначалникот на Гази Баба, Бобан Стефковски, кој веќе еднаш ја посети депинијата Вардариште минатата недела, објасни дека веќе имале координација повеќе институции и во наредниот период се очекува целосно надминување и решавање на проблемот со пожарите во депниите.
„Мислам дека бевте сите сведоци пред 10 дена заедно со надлежните институции имавме сериозна активност на потегот во депонијата Вардариште, која е под надлежност на Град Скопје. Таму имаше диви отпади отворени. Надлежните веќе процесуираа кривични пријави, дел од лицата завршија во притвор“, изјави градоначалникот на Гази Баба, Бобан Стефковски.
И за премиерот Мицкоски постојат сериозни индиции дека пожарот во депонијата Дрисла е подметнат. Владата ќе се заложи за целосно решавање на отпадот и дека Дрисла за брзо ќе личи на модерна европска депонија, а истото ќе се случи и со Вардариште.
„Оваа Влада за првпат апси, тие кои што нелегално топат кабли за да произведуваат бакар, за да го продаваат после, првпат оваа Влада реши да влезе во костец на решавање на проблемот, да го гасне, еве денес имаа координативен состанок и ќе го решиме тоа и добро е што граѓаните имаат очекувања од оваа Влада, затоа што од претходните видовме како поминало со децении“, изјави премиерот Христијан Мицкоски.
Во насока на зачувувањето на здравјето на Скопјани, премиерот истакна и дека засега од Владата нема препораки бидејќи нема зголеми параметри кои би биле алармантни.
