По речиси 100години од изградбата, целосно е реконструирана и модернизирана зградта на радовишката Противпожарна служба. Со ова, пожарникарите кои летово со натчовечки напори се бореа со огнената стихија на планината Готен, конечно добија современи услови за работа кои ќе овозможат побрзи и поефикасни интервенции. Реконструкцијата чини околу 12 милиони денари. Половина од средствата ги обезбеди Општина Радовиш, а другата половина се преку Центарот за развој на Југоисточен плански регион. Извршена е целосна замена на кровната конструкција, електроинсталацијата, подови, прозорци, врати, а поставена е нова инсталација на противпожарен водовод со хидранти и млазници.
„Тоа беше комплетна реконструкција на стариот Противпожарен дом во Радовиш и денеска може да видите дека ние практично го направивме домот нов. Проектот ги опфаќаше сите фази на реконструкцијата и денеска имаме простор во кој од сега натаму сите пожарникари во Радовиш, ќе имат подобри услови за да можат во секое време да се справуваат со она што значи непогоди, интервенции и за се она за кое тие постојат како единица„ изјави Ацо Ристов, градоначалник на Радовиш.
Противпожарната зграда се реконструираше преку програмата на Министерството за локална самоуправа, за подигање на енергетската ефикасност. Дополнително преку првиот и вториот јавен повик за средства од унгарскиот кредит, Радовиш ќе добие повеќе од 250милиони денари. Ресорниот министер, Златко Перински, најави дека со отпочнување на проект „Ресурсен центар„ Владата ќе им помогне на Центрите за развој на регионите, како и на локалните самоуправи.
„Тоа е првиот аспект којшто е многу важен, а вториот еве веќе и официјално да го најавам од следната година ќе започнеме со ажурирање на базите на даночни обврзници. Централната Влада, ќе го исфинансира овој проект и во периодот што ќе следи, фазно нормално на сите градоначалници, на сите општини кои сакаат да учествуват во оваа соработка ќе им се ажурираат базите на даночни обврзници со што ќе им се зголеми приходот од сопствени извори на финансирање коишто значително ќе може да ги имплементираат преку реализација на проекти во периодот којшто ќе следи„ изјави министерот за локална самоуправа, Златко Перински.
Освен Радовиш, министерот Перински ги посети и општините Босилово и Василево, кои од првиот и вториот јавен повик за искористување на средства од унгарскиот кредит ќе добијат 236 милиони денари, пари со кои значително ќе се подобри животот на граѓаните во овие две општини.
