Ниту сме барале, ниту сме земале мито. Станува збор за недоразбирање и нерасчистени работи.
Вака екс директорот на геријатрија Мусхин Арифи и посредникот Блерим Амити, двајцата обвинети дека барале и зеле поткуп од 20.000 евра за хоспитализирање на неподвижна жена, во судницата на Кривичниот суд, се правдаа дека се невини.
Адвокатите тврдат дека имаат докази и сведоци коишто ќе ја докажат невиноста на обвинетите. Тие на судот му предложија сведоци кои се вработени во геријатрија, а дел од нив присуствувале и на состаноците на кои според Обвинителството се преговарало за мито.
Обвинителството е самоуверено и цврсто стои на ставот дека има докази за вината на директорот и за вториот обвинет кој посредувал и пренесувал на старателката на неподвижната жена, колку и како да се даде поткупот.
Оваа постапка ја илустрира длабоката корупција вкорената во нашето општество, вели обвинителката Искра Хаџи Василева. Таа во воведните зборови рече дека храброста на сведокот да пријави овозможила да се поведе постапка и правдата да биде задоволена. Им порача на граѓаните да не молчат и да ја пријавуваат корупцијата со која живееме.
Инаку, според обвинителниот акт, Арифи побарал 20.000 евра за да овозможи прием на пациентка во тешка здравствена состојба. Амити, пак, кој го познавал сведокот, се понудил да посредува и ја примил паричната сума, по што бил фатен од полицијата.
Митото го пријавила братучедка на пациентката која и била старателка и се грижела за неа.
Инаку, 43 годишната пациентка била имотна, а тоа го знаеле и обвинетите. Тие од старателката барале да се продаде станот на болната жена и со тие пари да им се плати мито за нејзиното хоспитализирање. Директорот се гони за примање на мито, посредникот за примање награда за незаконско влијание. И двајцата се во притвор.
Судењето продолжува на 16 септември со сведочењето на пријавителката на поткупот.
