Од денеска во одмаралиштето на МВР на Пониква, со рехабилитација започнува втората група од околу 44 млади луѓе кои беа повредени во дискотеката „Пулс“ во Кочани.
Во наредните две недели за нив ќе се грижат специјалисти од Клиниката за пластична хирургија од Скопје, физијатри и физиотерапевти од Кочани и Штип, а истовремено со нив ќе работат и психолози. Освен групни, предвидени се и индивидуални терапии.
Според директорката на Кочанската болница, д-р Катерина Мирчовска, престојот на планина им годи на младите луѓе, а тоа позитивно влијае на нивната рехабилитација. Закрепнувањето оди добро и кај поголем дел од пациентите веќе се враќа моториката на екстремитетите.
Претходно на Пониква, двонеделна рехабилитација поминаа 45 млади луѓе, а веќе се прави список и за трета група.
