Засилени контроли на граничните премини и сузбиени мрежи кои нелегално увезувале половни автомобили и месо. Царинската управа за неполни пет месеци годинава поднела 85 кривични пријави односно онолку колку што биле поднесени од 2020 до 2022 година. Според директорот Николовски, постигнати се рекордни резултати, а се дејствува на повеќе фронтови.
„Применуваме сопфатен пристап за спречување на криминалот. Ги зајакнуваме сите капацитети и внатре и на граничните премини и на оние најфрекфентните и на оние со најмал сообраќај при што ги спречуваме обидите за криумчарење“, истакна директорот на Царинска Управа Бобан Николовски.
Откриле „мерцедес“ увезен во јули 2024 година, а прикажан како штотуку увезен, со лажно завршена царинска постапка и форензички докажано фалсификуван потпис и печат на фирма која воопшто не била поврзана со увозот на возилото. За овој случај кривични пријави се поднесени против деветмина.
„По преземените оперативни дејствија одделението за истраги и форензичка анализа направена и графолошко вештачење на одземената електронска опрема, документација од шпедитерот и нотарот од Скопје утврдено е дека документацијата употребена во сите процеси е фалсификувана како и дека е употребуван фалсификуван потпис и печат на фирма со цел возилото „Мерцедес“ да се пушти во промет без да се платат увозни давачки“, изјави директорот на Царинска Управа Бобан Николовски.
Цариниците откриле и случаи во кои увозници на месо го тарифирале месото со пониски каматни стапки за да не платат скоро 179 илјади евра. Парите се наплатени, а против сторителите се поднесени соодветни пријави.
