Владата забрзано работи на изготвување на новиот софтвер кои треба да им помогне на граѓаните полесно да ги споредуваат цените во маркетите. Преку новата дигитална алатка потрошувачите ќе можат на едно место да ги видат сите цени во сите маркети и да споредат каде е најевтино да пазарат. Проектот за следење на цените го водат Министерството за економија и пазарниот државен инспекторат и е во напредна фаза, а Министерството за дигитална трансформација, иако не е директно вклучено, стои на располагање доколку биде побарана техничка поддршка.
„Мислам дека се во напредна фаза на работа и во овој софтвер. Забележав и приватна инцијатива во овој дел, дека приватни субјекти невладини организации работат исто така на веб страна која ќе прибира цени и ќе ги агрегира, од нас не беше побарана поддршка и помош но стоиме на располагање доколку за тоа има потреба“, изјави Стефан Андоновски, министерот за дигитална трансформација.
Паралелно со новиот софтвер, премиерот Мицкоски најави и нови мерки за стабилизирање на цените и засилени контроли – и кај трговците, и кај дистрибутерите. Ако се утврдат драстични поскапувања, Владата ќе примени мерки и нема да се толерираат трикови преку прокси фирми под изговор за пијар и маркетинг. Посебен фокус ќе има и на влезните фактури – од каде тргнува формирањето на цената. Владата порачува – стихија на пазарот нема да се дозволи.
Досегашните мерки, како замрзнувањето на маржите, дале резултат – со намалување на цените и инфлацијата, посочуваат од Владата. Но, граѓаните чекаат конкретни алатки – како ветениот софтвер – што навистина ќе им го олесни секојдневието.
