Држава во која секое дете ќе расте во сигурна, грижлива и поттикнувачка средина. Ова е визијата на Владата потенцирана на денот на семејството, а која се темели на вредностите на еднаквост, инклузија и достоинствен живот.
„Министерството активно спроведува низа значајни иницијативи со цел унапредување на заштитата на децата и поддршката на семејствата, меѓу кои: Имплементација на Европската детска гаранција, со акцент на еднаков пристап до основни услуги за најранливите деца, Промоција на позитивно родителство, преку обуки, ресурси и поддршка за родителите, Развој на систем за рана интервенција, насочен кон навремено препознавање и поддршка на деца со потешкотии во развојот“ изјави Фатмир Лимани, министер за социјална политика, демографија и млади.
Власта најави низа мерки и иницијативи со цел унапредување на заштитата на децата и поддршка на семејствата. Во моментов се работи на изработка на национален акциски план за унапредување на детските права. Отворање на нови центри за поддршка на згрижувачки семејства, а се работи и на реформи на системот за социјална помош со цел кориснците постепено да бидат вклучени во работен процес, со цел да се намали нивната зависност од државата поддршка.
Меѓународниот ден на семејството е одреден од Обединетите Нации и се одбележува веќе 30 години. По тој повод меѓународната организација порача дека се потребни повеќе инвестиции во поддршка на семејствата за да се справиме со родовите нееднаквости, да се обезбеди здрав развој на децата, да се подобри благосостојбата на семејствата, да се поттикне економскиот раст и да се создадат поинклузивни и поотпорни општества.
