Министерот за дигитална трансформација, Стефан Андоновски, на денешната прес-конференција соопшти дека новите услуги од Основните судови се достапни за граѓаните преку националниот портал за електронски услуги – uslugi.gov.mk.
„Денеска имам чест да означам заокружување на еден значаен чекор во дигитализацијата на најважните услуги за граѓаните. На Националниот портал за електронски услуги – uslugi.gov.mk, од денеска се достапни две нови, долго очекувани услуги од Основните судови: Уверение од кривична евиденција за физички лица и Уверение од кривична евиденција за правни лица“, изјави Андоновски.
Министерот истакна дека овие услуги се меѓу најпопуларните и најчесто користените од страна на граѓаните, и додаде дека со воведувањето на овие услуги се комплетира пакетот судски потврди, кои се неопходни како за индивидуи, така и за компании, и кои го сочинуваат пакетот за неосудуваност.
