Во првите три месеци од годинава, стапката на илегални преминувања на европските граници е намалена за 30 проценти во споредба со истиот период од 2024 година. Најзначително намалување – од 64 проценти е забележано на миграциските рути што минуваат низ Република Македонија, Србија, Црна Гора и Албанија.
Според соопштението на Европската агенција за гранична и крајбрежна стража – Фронтекс, пад на бројот на илегални преминувања е регистриран на сите главни миграциски рути кои водат кон Европа. Тоа значи дека речиси 33.600 мигранти помалку се обиделе да влезат на територијата на ЕУ во споредба со истиот период лани.
„Иако миграциските движења се под влијание на различни фактори – од временски услови до вооружени конфликти – податоците укажуваат на континуитет на трендот на намалување кој беше присутен и во 2024 година. Тогаш беше забележано опаѓање од 38 отсто во однос на 2023 година“, изјави Џудит Сандерленд од организацијата Хјуман рајтс воч.
Оваа организација, како и други групи за човекови права, предупредува дека стратегиите за одвраќање на мигрантите и зголемено затворање на европските граници ги туркаат мигрантите кон поризични маршрути – меѓу кои и преминувањето преку Средоземното Море, пренесува „Гардијан“.
Паралелно со овие трендови, Европската унија продолжува со склучување на билатерални договори за миграција со земји надвор од Европа, како што се Либија и Тунис.
