Две скопјанки измамени за вкупно 1 милион денари: Лажни полицајци и амбасадори повторно во акција
Две скопјанки, на возраст од 81 и 82 години, биле измамени вчера во вечерните часови во два одделни случаи, со вкупен износ од 1 милион денари.
Според пријавата на 81-годишната жена, поднесена во 20:25 часот, таа била измамена од лице кое се претставило како полициски службеник. Тој ѝ соопштил дека нејзината ќерка предизвикала сообраќајна несреќа во која прегазила дете мигрант, и ако не плати на семејството на детето, ќерката ќе заврши во затвор. Жената подигнала 300.000 денари од банка и ги оставила на договореното место. По консултацијата со ќерка ѝ, открила дека станала жртва на измама, информира МВР.
Околу 23:00 часот, полицијата примила уште една пријава, овој пат од 82-годишна жена, која била измамена за 700.000 денари. Лицето што ја контактирало се претставило како службеник од странска амбасада и ѝ рекло дека нејзината ќерка во САД прегазила дете мигрант.
МВР презема мерки за расчистување на случаите и апелира за внимателност при вакви измами.
