Се уште е неизвесна здравствена состојба на повредените во најголемата трагедија што и се случи на Македонија каде во пожар загинаа 59 луѓе. За среќа во стабилна состојба се повредените кои останаа на скопските клиники, но најкритичните се лекуваат во соседните земји Грција и Бугарија. Министерот за здравство Арбер Таравари информираше дека уште 26 настрадани заминуваат на лекување во Словенија, Хрватска, Австрија и Србија. Вчера во болници во странство заминаа околу 20 повредени.
Повредените кои се лекуваа на клиниките во Штип и Кочани се пренесени во Скопје. На клиниката Мајка тереза се сместени 49-мина, во ГОБ 8-ми септември 18, а во стара градска болница 17 пациенти. Министерот Таравари ќе замине за Софија и Солун каде се лекуваат најкритичните пациенти.
Најкритичните пациенти почнаа уште од вчера да се транспортираат на лекување во странство. За жал, информициите оттаму говорат дека состојбата на повредените се уште е неизвесна. Од пациентите што се на лекување во странство, 9 се во Турција (3 во Истанбул, 6 во Анкара), 14 во Бугарија, 5 во Грција, 17 во Србија, 2 во Унгарија, 4-рица во Литванија. Се очекува за Белград да заминат уште 12 пациенти.
Состојбата на 14-те пациенти хоспитализирани во болници во Бугарија останува неизвесна, а петмина од нив се интубирани, соопшти бугарското Министерство за здравство. Повредените се со изгореници и оштетувања од вдишување жешки гасови. Во болницата „Пирогов“ во Софија примени се осум пациенти, меѓу кои тројца малолетници. Петмина од нив се на механичка вентилација.
Во Варна, во Воено-медицинската академија, се лекуваат тројца пациенти на возраст од 15, 17 и 20 години, од кои двајца се на респиратор.
И во Србија докторите се борат за животот на повредените. Дванаесет млади луѓе на возраст од 18 до 27 години, беа итно префрлени во Белград со воен авион на Србија. Меѓу најтешко повредените е 18-годишна девојка, која е со изгореници на 24 проценти од нејзината кожа. Дополнително, двајца пациенти се транспортирани од Скопје во Воената болница во Ниш и Клиничкиот центар во Ниш за понатамошно лекување.
На помош на македонските лекари пристигнаа 15 специјалисти од Србија и Чешка, а се очекува, во лекувањето на повредените да пристигнат доктори и од Израел.
Министерот Таравари и директорот на Фондот за здравство ги повикаа сите оние кои биле во дискотеката и не се повредени сепак да се јават на лекар поради можни вдишувачки изгореници.
Паула Костадиноска
