Венко еден и единствен. СДСМ ќе бира претседател на партијата, а изборот е сведен само на Филипче и никој друг. За разлика од пред неколку месеци кога во трката беа четворица кандидати за париски лидер, сега е само еден. Според Филипче тоа било доказ дека партијата се консолидира.
-Тоа е одраз на консолидацијата на партиското членство, на која што јас интензивно работев изминатите девет месеци. Веќе се пријавени поголем број на гласачи, се регистрираа за гласање отколку во претходниот циклус, изјави Филипче.
За познавачите пак ситуацијата е поинаква. Наместо консолидација, во СДСМ гледаат безидејност и можност за уште поголеми поделби. СДСМ на последните парламентарни избори го доживеа најголемиот дебакл во своето постоење, не освоија ниту 20 пратеници. За само неколку месеци се локалните, а според политичкиот аналитичар Александар Ристевски, социјалдемократите немаат основа да очекуваат подобар резултат. И тоа ќе биде според него повод за подлабоки поделби.
-Можеби е предзнак и на тоа дека целосно е колабирана партијата и падната на колена. Ако земеме во предвид дека само пред нецела година дена вкупно тие освоија вкупно ако земеме како политичка партија само 15 пратеници и знаејќи дека ништо не се подобрило во изминатиот период, а гледаме дека бројни луѓе од нивните структури или се оградуваат од нив или пак се пред органите на прогон, изјави Ристевски.
Ристевски не ја исклучва можност за нов лидер на партијата по локалните избори
-Ова е интересно земајќи во предвид дека имаме избори за неколку месеци, веќе оваа есен и тогаш ќе видиме дали воопшто таа претседателска условно речено стабилна титула како претседател, ќе остане за четири години или пак ќе биде основа за рушење на таа структура и можеби да почнат од ново, изјави Ристевски.
Филипче победи на претходните внатрепартиски избори, во една крајно поделена партиска структура. Неговите против кандидати Јован Деспотовски, Славјанка Петровска и Александар Бајдевски реагираа на изборот, обвинувајќи за влијание на Заев.
Матеја Петровски
