Управата за јавни приходи денеска ги информираше вршителите на дејности, односно обврзниците регистрирани како трговци поединци, физички лица кои се занимаваат со земјоделска и занаетчиска дејност, како и лицата кои вршат услуги или слободно занимање и кои остваруваат доход од вршење на дејност согласно член 19 од законот за данок на личен доход. Тие беа информирани дека се приближува крајниот рок за поднесување на годишен даночен биланс (образец „ДЛД-ДБ“) и Биланс на приходи и расходи (образец „Б“).
– „Даночниот период за кој се утврдуваат вкупните приходи и вкупните расходи во работењето на даночниот обврзник е една календарска година. Доколку даночниот обврзник вршел самостојна дејност за период пократок од една календарска година, за даночен период се смета периодот од годината во кој обврзникот ја вршел дејноста,“ се додава во соопштението од УЈП.
Обрасците „ДЛД-ДБ“ и „Б“ задолжително се поднесуваат до Управата за јавни приходи по електронски пат преку системот за е-даночни услуги на следниот линк: https://e-ujp.ujp.gov.mk, најдоцна до 17-ти март 2025 година (согласно тоа што 15-ти март е неработен ден). Овие обрасци се поднесуваат за доходот остварен во претходната година, а истите треба да се достават и до Централниот регистар на Р.М.
