Кучињата лаат караванот си врви. Закажаните интерпелации во Собрание воопшто не им ја поместија работата на членовите на Судски совет. На денешната седница, тие со полна пареа избираа судии и претседатели на судови за цела држава. Засега не се знае дали Весна Дамева, Милазим Мустафа, Павлина Црвенковска, Селим Адеми и Тања Чачарова Илиевска утре ќе се појават на седницата во Собрание за да се изјаснат за нивните интерпелации.
Првиот човек на Судскиот совет Александар Камбовски не знае што ќе се случува утре, ниту дали некој од членовите ќе си поднесе оставка доколку им се изгласа недоверба од пратениците.
Додека членовите на советот никого не фермаат и си тераат по свое, партии со спротивставени ставови за закажаните интерпелации. Брзањето со интерпелациите на петтемина членови на Судскиот совет, во услови кога се подготвува нов закон за ова тело ги обелоденувало вистинските намери на власта. Од СДСМ жестоко ја оквалификуваа иницијативата на владејачкото мнозинство за интерпелацијата на членовите.
Пратеникот од ВМРО ДПМНЕ Драган Ковачки, пак, вели дека правосудството во Македонија мора да се ослободи од политичките стеги на СДСМ и ДУИ. Тој потсети на политичкиот ангажман на поранешната претседателка Весна Дамева во СДСМ, а исто така и на нејзините претходници кои ја сведоа довербата на граѓаните во судството на само 2 %.
Дамева засега не открива дали ќе си поднесе оставка, доколку ѝ биде изгласана недоверба.
Членовите на Судскиот совет го искористија законското право и во рок од 15 денови по приемот на интерпелациите, писмено му одговорија на собранискиот спикер Африм Гаши. Утре, според деловникот, се предвидува 20 минути за образложување на интерпелацијата, од страна на еден од пратениците коишто ја поднеле и исто толку време за одговор од страна на лицето кому му се гласа доверба.
Паралелно со интерпелацијата на петтемина членови на Судскиот совет, македонската влада иницираше и постапка за разрешување на државниот јавен обвинител, Љупчо Коцевски.
