Фармацевтската компанија „Алкалоид“ лани забележа рекорден раст на продажбите и добивката. Вкупните продажби достигнаа 19 милијарди денари, што е 15% повеќе од лани. Продажбите во Македонија пораснале за 17%, а извозот за 14%, со најголем скок во Кипар (9 пати повеќе) и Литванија (2,5 пати повеќе).
Консолидираната добивка пред финансиските трошоци надминала три милијарди денари што е раст од 9%.
Најголем дел од продажбите (91%) доаѓаат од лекови, а остатокот од козметика, хемиски производи и билкарство. Компанијата инвестираше 19,4 милиони евра во нов модерен погон за таблети и 1,7 милиони евра во нова линија за влажни марамчиња.
Основани се две нови компании – една во Хрватска и една во Казахстан, со цел проширување на пазарите. Истовремено, „Алкалоид“ стана малцински акционер со вложување еден милион евра во јужнокорејската компанија Рофибио која развива нови лекови.
Лани компанијата вработи 253 луѓе и исплати бонуси за вработените. За годинава планира уште поголем раст и нови инвестиции.
