Андреј Жерновски е отповикан од должноста амбасадор во Романија. Како што објави Жерновски, без никаква претходна најава, информацијата ја дознал неформално по нејзината објава во „Службен весник“.
„Уште не можат да ги преболат трите круга и поразот во Центар. Од објава во „Службен весник“ дознав дека сум отповикан од должноста амбасадор на нашата земја во Романија, без никаква претходно добиена информација, што е спротивно на основните процедури пропишани во Уставот и Законот. Трагикомично! По 192 дена откако ме вратија на „консултации” во државата, при што брутално е погазен Законот за Надворешни работи, оваа одлука ја дознав сосема неофицијално. Очигледно, партиското резонирање повторно е посилно од законите и дипломатијата“, објави Жерновски на својот Фејсбук профил.
Указот на претседателката Гордана Сиљановска Давкова за отповикување на Жерновски е од 14 февруари годинава.
Жерновски како кандидат за нов амбасадор во Романија се претстави пред собраниската Комисија за надворешна политика во ноември 2023 година, а акредитивните писма, официјално ги предаде во март 2024 година.
