Утрово, сите домаќинки со радост ги дочекаа коледарчињата кои со песни, од врата на врата го најавија Христовото раѓање. За убавата вест ги даруваа со колачиња, ореви, костени и по некоја паричка, откако ќе ги наполнеа торбите со посластици, децата продолжуваа понатаму за да ја шират радосната вест.
„На Коледе рано стануваме и одиме по куќите, каде со песна ја кажуваме радосната вест за Христовото раѓање и домаќинките нас не послужуваат со овошје, оревчиња и многу други работи. Вечер е Бадник, кога е раѓањето на нашиот Исус Христос, нашиот Спасител“ велат дечињата
Домаќинките ги испочитуваа обичаите кои се негуваат со векокви. За нив полниот двор со дечиња, кои во еден глас ги пеат коледарските песни, е предвесник дека годината ќе биде среќна и бериќетна.
„Денеска е најубавиот ден. Дворовите ни се полни со дечиња. Чувството е преголемо и за нив и за нас возрасните„ изјави Гордана Плешкова.
„За домаќинките полните дворови со деца значат бериќетна година. Господ нека дава здравје на дечињата и многу среќа„ изјави Илинка Устичкова
Пеејќи ја песната за „Вечниот Бог“, над 500 дечиња со ѕвезди во рацете утринава и во Штип го најавија Христовото раѓање. Тие беа дел од Бадниковата поворка, која се одржува осма година по ред.
Александра Ристевска
