Политички прогон – ова е единствениот начин на кој може да се опише судскиот предмет „Оранизатори за настаните од 27-ми април“. Факт е дека поранешниот спикер и ексминистерите беа предмет на неоправдано гонење за кривичното дело тероризам, коментира новинарот Бранко Героски. Според него, барањето кое дојде од обвинителството за прекинување на кривичното гонење доцни цели 6 години.
- „Обвинението мораше да падне пред воопшто да влезе во судска процедура. Мислам, дека тројцата, а особено би рекол главниот обвинет г.Трајко Велјановски, да се изложени на сериозен политички прогон. Кој што сака нека рече, но факт е дека тие луѓе ги изгубија шансите за понатамошен политички кариери и воошто нивните семејства беа вознемирани и изложени на секакви „шикандирања“ од секаков вид. И мене навистина ми е жал што беа потребни цели шест години за да се дојде до овој момент кога јасно дека тројцата се веќе слободни луѓе односно ќе бидат опфатени со Законот за амнестија“ вели Бранко Героски – новинар.
Героски вели дека неиздржаноста на целото обвинение се покажала уште со исказите на 46 сведоци во текот на судската постапка, а дел од нив и политички противници на обвинетите.
- „Во случајот на Велјановски, конкретно, најдобро го познавам, многу е важно да се каже не само што човекот е опфатен со амнестијата, туку обвинението во целост спрема него и другите двајца обвинети, товарајќи ги за к.д. тероризам беше апсолутно неоправдано. Беше еден хир на обвинителката Вилма Русковска. Беше еден обид за одмазда и политички прогон кој го отфрлија дури и нивните политички противници“ вели новинарот во изјава за Алфа.
Обвинителството на последното рочиште призна дека имало правна пречка воопшто да се покрене случајот. После шест години агонија и прогон врз поранешните функционери, сфати дека немало основ за кривичен прогон бидејќи не се почитувал Законот за амнестија за настаните од 27 април, кој веќе бил во сила.
