Избраниот претседател на САД, Доналд Трамп, изјави дека е за продолжување на работата на „ТикТок“ во земјата, барем на некое време, тврдејќи дека добил милијарди прегледи на платформата за време на претседателската кампања.
Коментарите на Трамп беа еден од најсилните сигнали досега за неговото противење на можноста за излегување на „ТикТок“ од американскиот пазар. Во април, Сенатот усвои закон со кој се бара од матичната компанија на „ТикТок“, кинеската „БајтДанс“, да ја продаде апликацијата, повикувајќи се на загриженост за националната безбедност.
Нејасно е како Трамп ќе постигне поништување на одлуката за продажба на „ТикТок“, која беше изгласана со огромно мнозинство во Сенатот.
Трамп се осврна и на имиграцијата, уште една омилена тема во неговата кампања. Тој вети дека на првиот ден од функцијата ќе потпише серија извршни наредби за затворање на границата за илегалните имигранти, а истиот ден ќе ја започне најголемата операција за депортација во историјата на Соединетите Американски Држави.
Тој најави и дека ќе престане „лудилото“, уште на првиот ден од функцијата, наведувајќи дека под неговата администрација ќе има два пола – машки и женски.
