Русија лансираше балистички проектил со среден дострел во напад врз воен објект во Днипро, како одговор на неодамнешните украински удари со западни проектили со долг дострел, објави Владимир Путин. Тој откри дека новото оружје има кодно име „орешник“.
„Како одговор на употребата на американски и британски оружја со долг дострел, руските вооружени сили изведоа комбиниран напад врз еден украински воено-индустриски комплекс. Во борбени услови, ова беше пробно лансирање на еден од најновите руски проектили со среден дострел. Во овој случај, ненуклеарна хиперсонична верзија на балистички проектил. Тестот беше успешен. Метата беше погодена“, кажа Путин.
Тој додаде дека Русија е спремна на секаков развој на настаните. „Ако некој се сомневал, не би требало. Секогаш ќе има одговор. Последните напади врз Брјанск и Курск покажуваат дека конфликтот сега добил глобални елементи“, рече рускиот лидер.
Путин кажа дека западните држави нема да бидат во можност да пресретнуваат проектили како новоразвиениот „орешник“. „Овие проектили ја напаѓаат метата со брзина од 2,5-3 километри во секунда“, откри Путин и предупреди дека Русија може да гаѓа воени објекти во секоја држава чии оружја се користат против неа.
Украина првично тврдеше дека Русија лансирала интерконтинентален балистички проектил, што беше оспорено од западни функционери и експерти.
Претходно Русија и се закани и на Полска. Порача дека ќе ги нападне американските воздушни бази во оваа земја со „напредно оружје“.
Москва оцени дека отворањето на новата американска база за балистичка ракетна одбрана во близина на балтичкиот брег, „го зголемува целокупното ниво на нуклеарна опасност“, додавајќи дека базата е додадена на руската листа на потенцијални цели.
