Вкупно 11 лица утрово се уапсени во врска со трагедијата во Нови Сад, кога при пад на натстрешницата на железничката станица животите ги загубија 15 луѓе, а двајца беа тешко повредени, соопшти вишото јавно обвинителство во Нови Сад.
Меѓу единаесеттемина уапсени, како што објави српскиот национален сервис се и министерот за транспорт во оставка Горан Весиќ, неговата помошничка задолжена за Железнички и интермодален транспорт, Анита Димоски, в.д. Директорката на Јавното претпријатие Јелена Танасковиќ, која вчера си поднесе оставка од функцијата, како и нејзиниот претходник во претпријатието, Небојша Шурлан.
Според соопштението, четворицата се сомничат за тешко кривично дело против општа сигурност. Останатите тешко кривично дело против општата сигурност во врска со кривичното дело непрописно и неправилно извршување градежни работи. По објавата од Обвинителство, Весиќ на социјалните мрежи вели дека не бил уапсен, туку доброволно се одзвал на повикот на полицијата.
„Дојдовме во Нови Сад и им се ставив на располагање на истражните органи за целосно да се истражат сите околности кои довеле до несреќата во Нови Сад“, напиша Весиќ на својот фејсбук-профил.
Весиќ беше првиот кој поднесе оставка по несреќата, на 5 ноември. Тогаш тој изјави дека оставката ја поднесува од морални причини, но оти не прифаќа вина за несреќата. Оставки од функциите, вчера поднесоа Министерот за внатрешна и и надворешна трговија, Томислав Момировиќ, и в.д. Директорката на јавното претпријатие „Железничка инфраструктура“, Јелена Танасковиќ.
Момировиќ беше на чело на Министерството за градежништво, транспорт и инфраструктура на Србија во времето на реконструкцијата на железничката станица во Нови Сад.
