Комисија од Министерството за здравство ќе го испитува случајот со смртта на петгодишно девојче кое почина на Детската клиника. Министерот Таравари не сака да суди пред да го добие извештајот, и остава се’ во рацете на педијатрите кои ќе прават увид во целата документација како се лекувало детето. Оваа одлука на министерот следи по вонредниот инспекциски надзор на Државниот санитарен и здравствен инспекторат каде се утврдени низа недостатоци при третманот на девојчето.
“Уште еднаш ќе повторам дека сите резултати што се направени, барем јас зборувам и како лекар и покачената концентрација на протеини во ликворот на за жал починатото дете и намалената концентрација на гликоза во ликворот и наодот од ЕКГ кај што доминираат бавни бранови, упатува на сериозен сомнеж за енцефалит. Меѓутоа, да оставиме Комисијата, не би сакал да давам изјави пред да има официјален извештај од компетентни педијатри кои веќе се назначени од Клиниката за педијатрија за да направат увид во целата документација за тоа како се третирало детето”, истакна Таравари.
Во извештајот на ДСЗИ е наведено дека девојчето за време на болничкиот третман било лекувано од повеќе лекари и му се правени дополнителни лабораториски испитувања. Инспекторите констатирале и лошо водење на евиденцијата за починатото девојче, а алармантно е што и покрај укажувањата на инспекторатот се уште на клиниката дежураат само специјализанти.Директорот на Државниот санитарен и здравствен инспекторат најави вонредни контроли на Клиниката.
“Тоа решение истекува утре и има рок од 30 дена клиниката да си ги исправи недоследностите.ДЗСИ во следните денови ќе направи вонреден инспекциски надзор да направиме контрола.Детската Клиника треба да си го регулира тој момент односно, при работата на специјализантите секогаш треба да има специјалист кој што треба да бидат заедно во делот на работењето” – изјави директорот на ДЗСИ, Кирил Лазов.
За еден месец ова е трет смртен случај на дете на Клиниката. Претходно починаа новороденче од Струмица и 14 месечно девојче од Гошинце за кое се води постапка за утврдување на евентуална лекарска одговорност.
Ања Лукарова
