Глумење мачо политика, без никаков основ за успех. Ова е начинот на дејствување на македонската опозицијата со барањето на предвремени парламентарни избори. Според познавачите ова е класичен опозициски фолклор, со цел привлекување на некакво внимание на јавноста. Новинарот Бранко Героски за Алфа вели дека на СДСМ во моментов е во многу тешка ситуација и избори најмалку им се потребни.
-Во моментов состојбата во партијата е тешка, тоа го признаваат сите, некои погласно некои молчешкум. Во секој случај партија во таква состојба во принцип не треба да бара избори. Повиците од лидерот Венко Филипче ги оценувам како класичен фолклор, мачо политика, нешто што е веќе видено на нашите простори, изјави Героски.
Барањето на СДСМ за предвремени избори, доаѓа откако тоа претходно го побара ДУИ. Очигледно не се менува начинот на работа во сега опозициската партија, односно се следи начинот на работа на партијта на Ахмети. Според Героски во моментов избори не му се потребни ниту на ДУИ. А кога е СДСМ во прашање вели потребно е прво да се структуираат внатрепартиски, бидејќи партијата се уште нема ниту раководство.
-Нема логика во барањата за предвремени избори и од СДСМ и од ДУИ. Во случајот на СДСМ партијата е пред два конгреса. Едниот конгрес е сега на кој треба да се изберат новите делегати на конгресот, новите раководни тела, а во март догодина на актуелниот лидер му истекува мандатот. Така што на СДСМ и претстојат внатрешни, кадровски реформи, идеолошки реформи, промена на политичката програма, изјави Героски.
СДСМ во мај годинава го доживеа најтешкиот пораз во историјата, освои само 18 пратеници, а според моменталните мерења на јавното мислење нивниот рејтинг е многу понизок во однос на власта. Според последната анкета на ИПИС, рејтингот на ВМРО-ДПМНЕ е 26 проценти, додека СДСМ е на рамниште со ДУИ и коалицијата Вреди, со доверба од седум проценти. Премиерот Мицкоски пак има рејтинг од 27,8 проценти, додека Венко Филипче само 5,5.
Матеја Петровски
