На Македонија и е потребно независно судство, реформи во јавната администрација, европеизација на институциите, силна борба против корупцијата и криминалот, нов Кривичен Законик. Најновиот Извештај на Европската Комисија за напредокот на земјава ја нотира посветеноста кон евроинтеграциите и усогласеноста со надворешната и безбедносна политика на ЕУ. Пофалби за реформската агенда која ги опфаќа заложбите за реформи во управата, менаџирањето со јавните финансии, зелената и дигитална транзиција, развојот на приватниот сектор, заштитата на основни права и владеењето на правото.
Сепак меѓу најболните теми е состојбата во судството и високото ниво на корупција, за што експертите велат дека мора да се преземат итни мерки.
Предочена е тука таа законска измена која треба да се направи повторно. Нов Кривичен законик и сите можности за амнестија и ред други дела да се преквалификуваат. Конечно мора да се придржува владата и до законски пропишаниот процент на средства кои владата ги одвојува за судски буџет. Доказ е дека владата е посветена на судството и борба против корупција. Треба и да се донесат препораките на Оценската мисија за состојбите во судски совет. Би ја издвоил и реформата на јавната администрација, објаснува за Алфа, претседателот на Институт за демократија „Социетас цивилис“, Марко Трошановски.
По прифаќањето на францускиот предлог од претходната владејачка структура, покрај сите обврски на патот кон ЕУ, стојат и уставните измени. Власта нема намера да направи ниту еден чекор без да има силни гаранции дека тоа ќе биде последното барање од Бугарија, па затоа настојува за уставни измени со одложено дејство. Ова според Трошановски е изводливо и не задира во методологијата на проширување.
Предлогот е сосема разумен и оперативно изводлив без да се менува ништо во прег рамка ниту во методологијата на проширување, но бара согласност од бугарска страна. Се додека Бугарија има ваква политичка ситуација, дали преодни влади или постојани избори. немаме соговорник. Кога немаме соговорник, веројатноста е мала бидејќи било кое решение ќе бара амин од Бугарија, додава Трошановски.
Во Извештајот се посочува дека земјава треба да одржува добри односи со другите земји опфатени со процесот на проширување и дека активно се вклучила во спроведувањето на Планот за раст на Западен Балкан. Да се продолжи со ангажманот за регионалните иницијативи и да се почитуваат билатералните договори.
Извештајот е за периодот од септември 2023 година до септември 2024 година и опфаќа три влади – владата на Димитар Ковачевски, техничката влада предводена од Талат Џафери, и новата на чело со Христијан Мицкоски која беше избрана на 23 јуни годинава.
