Кривичниот суд ги откажа следните две рочишта за судењето за убиството на Вања Ѓорчевска и Панче Жежовски, причината влошената здравствена состојба на еден од обвинетите.
„Поради интерес на медиумите и невладините организации, кои ја следат главната расправа за предметот со К. бр. 1339/24, поврзан со двојното убиство на малолетната В. Ѓ. и велешанецот П. Ж. од ноември 2023 година, ја известуваме јавноста дека: ЈЗУ Универзитетската клиника за нефрологија во Скопје, на 2.10.2024 година, го извести Основниот кривичен суд Скопје дека притвореникот Б. В., кој е еден од обвинетите во конкретниот предмет, од КПУ ‘Затвор Скопје’ е префрлен и хоспитализиран во наведената клиника поради влошена здравствена состојба“, информираат од Кривичен суд.
Судењето, како што додаваат оттаму, ќе продолжи на 14 октомври, за кога е закажано следното рочиште. Тогаш, како сведоци треба да се појават и мајката, бабата и дедото на Вања.
Боре Видевски, кој е еден од петтемина обвинети за убиството на Вања и Панче, во понеделникот во неконтактибилна состојба бил пренесен на Клиниката за Нефрологија. Неговиот адвокат, Бојан Манев, изјави дека Видевски со речиси откажан бубрег бил префрлен на скопските клиника, откако во затворската ќелија константно се жалел на болки.
