Само една фирма е заинтересирана за вториот тендер за набавка на нова компресорска станица на Клинички. Дали ќе “падне” договор помеѓу компанијата и Министерството за здравство ќе одлучува Комисијата за јавни набавки во одреден законски рок. Понудата е за набавка, монтажа и пуштање во работа на системот за компримиран воздух кој ќе ги снабдува сите клиники. Проценетата вредност на набавката беше над 18 милиони денари, односно 300 илјади евра.
“Пристигната е една понуда, за која во наредиот период во рамки на законските рокови, ќе се изврши евалуација од страна на Комисијата за јавни набавки и стручни лица по што, доколку истата ги усполнува условите од тендерската документација, ќе биде донесена одлука за избор на најповолна понуда и ќе се пристапи кон склучување на Договор за јавна набавка” – велат од Министерство за здравство.
Ако повторно не се склучи договор со компанија, министерот Таравари кажа дека ќе одат со директно договарање со фирма која може да инсталира нова станица за компримиран воздух и да се нормализира работа во операционите сали, бидејќи сега се користат надворешни компресори, интервенциите се редуцирани, а листата на чекање постојано се зголемува.
Операционите сали во хируршките клиники со месеци работат со надворешни компресори, кои се преодно решение до поставувањето на новиот компресорски систем.
Драмата со системот на компримиран воздух на скопска хирургија трае од средината на мај, кога операционите сали беа затворени откако се појавила непозната миризба во салите.
Инаку, во јавноста излегоа информации дека причина за смрдеата во хирушките сали е опасниот формалдехид во доводот кој не е во употреба, но дополнителните мерења не покажаа присуство на ова хемиско соединение над дозволеното во салите. Од Клиника за трауматологија, анестезија, реанимација информираа дека се преземени дополнителни превентивни мерки, вклучувајќи почести и ненајавени мерења на квалитетот на воздухот во хируршкиот блок за поголема безбедност и на персоналот и на пациентите.
