Состојбата во судството е катаклизмична и потребни се итни реформи – премиерот не се откажува од идејата за распуштање на Судскиот и Советот на јавни обвинители. Ако треба ќе го продолжи рокот за консултации и нови идеи кои првично беше до крајот на август. Мицкоски е дециден дека се отворени за дебати, предлози и идеи, само Македонија конечно да стане правна држава.
Се уште останувам на ставот дека се потребни реформи во судството. Довербата е катаклизмична. Во нашата програма е да се распуштат советите бидејќи овие се партизирани. Ако се отвори дебата, отворени сме да ги сослушаме сите. Ако е потребно да направиме еден мозаик од идеи, само за да имаме правна држава. Ако немаме правна држава, имаме безбедносна закана. Мораме да одговориме соодветно и ќе правиме реформи за да ја поразиме безбедносната закана. Не значи тоа само ако некој земе оружје и нападне, тоа е само еден аспект. Ако имаме криминални групи, корумпирани луѓе, го рушат интегритетот. Ќе продолжиме со консултации, до крајот на август, а може и понатаму ако е потребно, порача Мицкоски.
Последните случувања со судијата Пајазит Пајазити кој му додели куќен притвор на командатот на УЧК Блерим Рамадани, па поради тоа тој се даде во бегство, и безусловното прифаќање на спогодбата за признавање вина на членот на Советот на јавни обвинители, Иџет Мемети се уште еден доказ дека правосудниот систем е на колена. Мицкоски за Пајазити вели дека и во минатото имал дискутабилни пресуди.
Пајазит Пајазити е судија кој има направено многу вакви пресуди, дискутабилни. Оставам на судскиот совет да ги истражи овие случаи, рече Мицкоски.
Инаку, вчера Мицкоски се сретна со претседателката на Судски совет Весна Дамева, и порача дека невладеењето на правото и криминалот се безбедносен проблем.
Дамева пак порача дека институцијата може да се реформира преку имплементација на препораките од Извештајот на Оценската мисија, а судската и извршната власт не треба да се гледаат како соперници, туку напротив како соработници.
