Некогаш консензуалниот кандидат за претседател на оската СДСМ-ДУИ, остана осамен. Стево Пендаровски во трката за втор мандат нема поддршка од интегративците и нивната коалиција „Европски фронт“ – го оставија на цедило верниот партнер. Водржаноста на ДУИ и одлуката да не поддржат никого доаѓа во време кога опозицијата алармира дека се спрема сценарио за бојкот. Коалицијата предводена на Али Ахмети имала доволно демократско искуство, да ги остават гласачите сами да си одлучат за кој број ќе го заокружат на претседателските избори.
„Ќе ги повикаме сите граѓани да учествуваат во изборниот процес, и да одлучуваат според нивните оценки и нивните приоритети. Имаме демократско искуство и верувам дека сите граѓани ќе можат да ги препознаат своите приоритети меѓу кандидатите, кој од кандидатите во вториот круг ќе ги исполни нивните очекувања“ рече Илми Азири од Европски фронт.
И коалицијата на здружената албанска опозиција стои на страна. Немало да им даваат насоки на гласачите кој од двајцата кандидати да поддржат бидејќи тоа било нивно избирачко демократско право. За нив е чудно што ДУИ сепак го оставиле Стево Пендаровски, како што велат, сам во калта.
Цело време не убедуваа дека Пендаровски е најдобар претседател, најдобра опција, беше заеднички кандидат, а сега го оставија во калта. Што се однесува до гласовите, ние ги немаме во џеб гласовите, нашите гласови не се купени како оние на ДУИ и затоа е тешко да се насочат гласачите за кого да дадат поддршка во вториот круг – рече Меџити од „Вреди“.
Лидерите од Вреди обвинија и дека ДУИ во страв од пораз на изборите сакале да предизвикаат политичка криза. Според нивните тврдења Али Ахмети се јавувал по општински организации и повикувал на бојкот на вториот круг од претседателските избори.
